ಎಲೆಕ್ಟ್ರಿಕ್ ಸ್ಟೋವ್ವು, ಗ್ಯಾಸ್ ಸ್ಟವ್ವು, ಹಾಟ್ ಪ್ಲೇಟು, ಸೋಲಾರು, ಓವನ್ನು, ಕೂಕಿಂಗ್ ರೇಂಜ್,    ಇವೆಲ್ಲಾ ಕಾಣುತ್ತಾ ಬೆಳೆದ ಮಕ್ಕಳಿಗೆ ಈ ಚಿತ್ರವನ್ನ ತೋರಿಸಿದಾಗ ಏನನ್ನಿಸ ಬಹುದು? ಈಗ ಲಭ್ಯವಿರುವ ಎಲ್ಲಾ ಸಂಪನ್ಮೂಲಗಳನ್ನು ಎರ್ರಾ ಬಿರ್ರಿ ಬಳಸಿದ ನಂತರ ಬಹುಶಃ ನಾವು ಬಂದು ಮುಟ್ಟುವುದು ಇಲ್ಲಿಗೋ ಏನೋ? ನಾಸ್ಟಾಲ್ಜಿಕ್ ಚಿತ್ರ, ನನಗಂತೂ ಇದನ್ನು ಕಂಡು, ಇಂಥ ಅಡುಗೆ ಮನೆಯಲ್ಲಿ ಉಂಡು ಪರಿಚಯವಿದೆ. ನಿಮಗೂ ಇದೆಯಾ………..?    

ಒಂದ್ನಿಮ್ಷ, ಒಂದ್ನಿಮ್ಷ. ಹೋಗ್ಬೇಡಿ. ಈ ಚಿತ್ರದಲ್ಲಿರುವ ಹೆಣ್ಣು ಮಗಳ ಮೊಗದ ಮೇಲಿನ ಮೊಗ್ಗಿನ ಮಂದಹಾಸ ಗಮನಿಸಿದಿರಾ? ಆ ಪ್ರಸನ್ನತೆ, ಸಂತೃಪ್ತ ಭಾವ contentment, ಮಣ್ಣಿನ ಒಲೆ, ಒಲೆಯ ಹತ್ತಿರ ಒಂದು ಡಬ್ಬ, ಬಹುಶಃ ಕೈ ಬೆರಳಿಗೆ ಸಿಗುವಷ್ಟು ಮಾತ್ರ ಇರಬಹುದು ಸಾಸುವೆ ಅಥವಾ ಕಾಫಿ ಪುಡಿ, ಇಷ್ಟೊಂದು ಬೇಸಿಕ್ಸ್ ಗಳ ನಡುವೆಯೂ ಆಕೆಯ ಮುಖದ ಮೇಲಿನ ತೃಪ್ತ ಭಾವ… ಹೊಳೆಯುವ ಡಿಸೈನರ್ ಅಡುಗೆ ಮನೆಯ ತುಂಬಾ ಅತ್ಯಾಧುನಿಕ ಫ್ರಿಜ್ಜು, ಮೈಕ್ರೋ ವೇವ್, ಸ್ಟೋವ್, ವಾಷಿಂಗ್ ಮೆಶೀನ್, ಮಿಕ್ಸರ್, ಕೌಂಟರ್ ಟಾಪ್ ಮೇಲೆ ಫೇಸ್ ಬುಕ್ನಲ್ಲಿ ಸ್ಟೇಟಸ್ ಅಪ್ಡೇಟ್ ಮಾಡಲು ಕಾತುರದಿಂದ ಕಾಯುವ ಲ್ಯಾಪ್ ಟಾಪ್, ಇವುಗಳ ಮಧ್ಯೆ, ಇಷ್ಟೆಲ್ಲಾ ಸೌಲಭ್ಯಗಳ ನಡುವೆ ವೇಳೆ ಕಳೆಯುವ ಆಧುನಿಕ ಮನೆಯೊಡತಿಯ ಮುಖದ ಮೇಲೆ  ಕಾಣಲು ಸಿಕ್ಕೀತೆ ಮಂದಹಾಸ? ಕಾಣಲು ಸಿಗುವುದೇ ‘ಕಂಟೆಂಟ್ ಮೆಂಟ್’?

pic courtesy: www.cnn.com

ನನ್ನ ಯಾಹೂ ಮೇಲ್ ಬಾಕ್ಸ್ ನಲ್ಲಿ ಕಾಣಿಸಿ ಕೊಂಡ ಮೇಲು. ಇಂಥ ರೈಲು ಬಿಡುವ ಮೇಲುಗಳ ಬಗ್ಗೆ ಎಚ್ಚರ ದಿಂದಿರಿ. ಈ ಮೇಲನ್ನು ಹೆಚ್ಚಾಗಿ ನೈಜೀರಿಯಾದ ಖದೀಮರು ಕಳಿಸುತ್ತಾರೆ.

ಡಿಯರ್, ಯಾಹೂ ಚಾಟ್ ಮೆಂಬರ್, ಯಾಹೂ ಚಾಟ್ ನ ನಿಗಾ ಕೇಂದ್ರ ಪ್ರತೀ ದಿನ ಚಾಟ್ ರೂಂ ಗಳಲ್ಲಿ ಭಾಗವಹಿಸುವವರ ಭಾಷೆ, ವರ್ತನೆಯನ್ನ ಗಮನಿಸುತ್ತಿದ್ದು, ನೀವು ಇದುವರೆಗೆ ಅತ್ಯಂತ ಸಭ್ಯವಾಗಿ ವರ್ತಿಸಿದ ಕಾರಣಕ್ಕಾಗಿ ತಮಗೆ ನಮ್ಮ ನಿಗಾ ಕೇಂದ್ರದ ವತಿಯಿಂದ “ನಾಲ್ಕು ಲಕ್ಷದ ಇಪ್ಪತ್ತೈದು ಸಾವಿರ” ಅಮೇರಿಕನ್ ಡಾಲರುಗಳ ಪುರಸ್ಕಾರ ಪ್ರದಾನ ಮಾಡಲಾಗಿದೆ. ತಮ್ಮ ಚೆಕ್ ಪಡೆಯಲು ಈ ಕೆಳ ಕಂಡ ವಿಳಾಸವನ್ನ ಸಂಪರ್ಕಿಸಿ. ತಮ್ಮ ಉತ್ತಮ ನಡತೆಗೆ ನಮ್ಮ ವಂದನೆಗಳು.

Contact Person: Mr. Austin Onye

Email: chataward@yahoo.com Telephone: +2348034161082

ಆಟೋ ಸೇವ್ ಆಯ್ತು, ಸ್ಪೆಲ್ ಚೆಕ್ ಆಯ್ತು, ಮತ್ತಿನ್ನೇನೋ ಬಂದವು.  ಈಗ ಬಂತು “ಟೋನ್ ಚೆಕ್”. ಗಣಕ ಯಂತ್ರವನ್ನು ಸ್ಟುಪಿಡ್ ಬಾಕ್ಸ್ ಎಂದು ಮೂದಲಿಸಿದ ವ್ಯಕ್ತಿ ಈಗ ಸ್ಟುಪಿಡ್. ನಮ್ಮ ಬದುಕನ್ನು ಸರಳವಾಗಿಸಿದ ಗಣಕ ಯಂತ್ರವನ್ನು ಹಾಗೆಂದು ಮೂದಲಿಸೋದು ಅಪರಾಧ. ಇರಲಿ ಈಗ “ಟೋನ್ ಚೆಕ್” ಗೆ ಬರೋಣ. ಟೋನ್ ಎಂದರೆ ಚರ್ಮದ tone ಅಲ್ಲ, ನಾವಾಡುವ ಸ್ವರ.  ಕೋಪಗ್ರಸ್ಥರಾದಾಗ ನಾವಾಡುವ ಮಾತುಗಳು ಕೇಳುಗರ ಅಥವಾ ಓದುಗರ ಮೇಲೆ ಬೀರುವ ಪರಿಣಾಮದ ಅರಿವು ಇದ್ದರೆ ತಾಪತ್ರಯಗಳು ಕಡಿಮೆ. ತಾಣವೊಂದರಲ್ಲಿ ಒಬ್ಬರೊಂದಿಗೆ ಚರ್ಚೆಗಿಳಿದಾಗ ಒಬ್ಬ ವ್ಯಕ್ತಿ ಹೇ, ಮಿಸ್ಟರ್, you are exposed ಎಂದು ನನ್ನನ್ನು ಮೂದಲಿಸಿತು. ತಮ್ಮ ideology ಗೆ ಧಕ್ಕೆ ತರುವ, ಟೀಕೆಗೆ ಒಳಪಡಿಸುವ ಯಾರನ್ನೇ ಆದರೂ ನಿರ್ದಯವಾಗಿ ಇಂಥ ಜನರು   ಬೇಟೆಯಾಡುತ್ತಾರೆ. ಇಂಥ ಜನರ ಬಗ್ಗೆ outlook ವಾರಪತ್ರಿಕೆಯಲ್ಲಿ CNN-IBN ನ ಸಾಗರಿಕ ಘೋಷ್ ಒಂದು ಲೇಖನ ಬರೆದಿದ್ದರು. ಒಬ್ಬ ಹೆಣ್ಣು ಮಗಳಿಗೆ ಈ ತೆರನಾಗಿ ಬರೆಯುವ, ಜರೆಯುವ ಜನ ಬೇರೆ ಯಾರನ್ನು ತಾನೇ ಬಿಟ್ಟಾರು?   ಅಂತರ್ಜಾಲ ಅನಾಮಿಕತನ (anonymity) ವನ್ನೂ ಕೊಡಮಾಡುವುದರಿಂದ ಎಗ್ಗಿಲ್ಲದೆ ಹರಿ ಹಾಯುತ್ತಾರೆ ಜನರ ಮೇಲೆ. ನಿಮಗೆ ನೋವಾಯಿತೋ ಇಲ್ಲವೋ, ಇದರ ಪರಿವೆ ಇಲ್ಲ. ಮನದೊಳಗೆ ಕೊಳೆತು ಕೂತಿದ್ದನ್ನು ಲೀಲಾಜಾಲವಾಗಿ ಯಾರದಾದರೂ ಮೇಲೆ ಡಂಪ್ ಮಾಡಿ ಮಗುಮ್ಮಾಗಿ ಇದ್ದು ಬಿಡುತ್ತಾರೆ.ಇವರುಗಳ ಈ ವರ್ತನೆಗೆ ರೋಸಿ ಹೋಗದ, ಇಂಟರ್ನೆಟ್ ಸಹವಾಸವೇ ಬೇಡ ಎಂದು ಕೈ ಚೆಲ್ಲದವರು ಸಂಖ್ಯೆಯಲ್ಲಿ  ಕಡಿಮೆ ಎಂದೇ ಹೇಳಬಹುದು.   

ಕೆಲವರ ಮೇಲೆ ಹೇಳಿದ ಹಾಗೆ, ಅವರ ವರ್ತನೆ deliberate. ಇನ್ನೂ ಕೆಲವರು ತಮಗೆ ಅರಿವಿಲ್ಲದೆ ಸ್ವಲ್ಪ ಖಾರವಾದ ಭಾಷೆ ಉಪಯೋಗಿಸುತ್ತಾರೆ. deliberate ಮತ್ತು ನಾಟ್ ಸೋ ಡೆಲಿಬರೆಟ್ ಪೈಕಿಯವರಿಗೆಂದೇ ಬಂದೈತೆ ಟೋನ್ ಚೆಕ್. ಲೇ, ಬೋ**ಮಗನೆ, ತಲೆಯೊಳಗೆ ಹೇ** ತುಂಬಿಸಿ ಕೊಂಡಿದ್ದೀಯ…ಅದೂ ಇದೂ ಎಂದು ಬಾಯಿಗೆ ಬಂದಂತೆ ಮಾತನಾಡಿ ಪೋಸ್ಟ್ ಎಂದು ಕೀಲಿಮಣೆಯ ಮೇಲೆ ಬೆರಳನ್ನು ಕುಕ್ಕಿದ ಕೂಡಲೇ ಬರುತ್ತೆ ವಾರ್ನಿಂಗ್. ತಮ್ಮಾ, (ತಂಗೀ ?) ನೀನು ಮಾಡುತ್ತಿರೋ ಕೆಲಸ ನಿನಗೆ ಹೇಳಿಸಿದ್ದಲ್ಲ, ಮತ್ತೊಮ್ಮೆ ಓದಿ ನೋಡು, ಇದೇ ರೀತಿ ನಿನಗೂ ಯಾರಾದರೂ ಬರೆದಾಗ ನಿನಗಾಗುವ ಸಂಕಟದ ಬಗ್ಗೆ ಯೋಚಿಸು, ಪರರಿಗೆ ಬಯಸಿದ್ದನ್ನೆ ನಿನಗೂ ಬಯಸಿದಾಗ ಆಗುವ ಅನುಭವ, ಅನುಭಾವದ ಕಡೆ ಗಮನ ಕೊಡು ಎಂದು ಗೋಗರೆಯುತ್ತೆ ಈ ಹೊಸ “ಟೋನ್ ಚೆಕ್” ತಂತ್ರಜ್ಞಾನ. ಆದರೆ ಕೆಲವು ಕಂಪೆನಿಗಳು ಈ ತಂತ್ರ ಜ್ಞಾನ ವನ್ನೂ ಅಳವಡಿಸಿಕೊಳ್ಳಲು ತಯಾರಿಲ್ಲವಂತೆ. ಏಕೆಂದರೆ ತಮ್ಮ ಉದ್ದಿಮೆಗಳ ಇಮೇಲ್ ಗೌಪ್ಯತೆ ಬಹಿರಂಗ ವಾದೀತು ಎನ್ನುವ ಆತಂಕ. 

ನೋಡಿ, ಯಾವ ಯಾವ ರೀತಿಯಲ್ಲಿ ನಮ್ಮ ಬಗ್ಗೆ ಖಯಾಲಿ, ನಿಗಾ ಇಟ್ಟು ಕೊಂಡಿರುತ್ತಾರೆ ಈ ಇಂಟರ್ನೆಟ್ ಉದ್ಯಮಿಗಳು. ಅದೇ ಸಮಯ, ಅಲ್ಲಿ ಉಗುಳಬಾರದು, ಇಲ್ಲಿ ಉಗುಳಬಾರದು, ಇಲ್ಲಿ ಮೂತ್ರ ವಿಸರ್ಜನೆ ಮಾಡಬಾರದು, ಚೀಟಿ ಅಂಟಿಸಬಾರದು, ಗಲೀಜು ಮಾಡಬಾರದು, ಬಸ್ಸಿನಿಂದ ಹೊರಗೆ ಕೈ ಹಾಕಬಾರದು… ಅದನ್ನು ಮಾಡಬಾರದು…ಇದನ್ನು ಮಾಡಬಾರದು ಎಂದು ಪ್ರಬುದ್ಧರನ್ನು, ವಯಸ್ಕರನ್ನು ಗದರಿಸುವ ಪರಿಪಾಠ ಇಂಟರ್ನೆಟ್ ಗೆ ಬರಬಾರದಿತ್ತು “ಟೋನ್ ಚೆಕ್” ಆವಿಷ್ಕಾರದ ಮೂಲಕ.

ಹೊಸ ಜಾತಿಯ ಕಪಿಯ ಪತ್ತೆ ಹಚ್ಚಲಾಗಿದೆ ಆಫ್ರಿಕಾದ ಕಾಂಗೋ ದೇಶದಲ್ಲಿ. ೨೮ ವರ್ಷಗಳಲ್ಲಿ ಈ ಪತ್ತೆ ಎರಡನೆಯದಂತೆ. “ಲೆಸುಲ” ಇದರ ಹೆಸರು ಮತ್ತು (Cercopithecus lomamiensis) ಜಾತಿಗೆ ಸೇರಿದ್ದು. ಸಂಖ್ಯೆಯಲ್ಲಿ ವಿರಳವಾಗಿರುವ ಈ ವಾನರ ಜಾತಿ ಬಗ್ಗೆ ಪ್ರಾಣಿ ತಜ್ಞರಿಗೆ ಆತಂಕವಿದ್ದು ಇದನ್ನು ಉಳಿಸುವ ಕಡೆ ಗಮನ ಹರಿಸಿದ್ದಾರೆ.

ಚಿತ್ರ ಕೃಪೆ:  www.guardian.co.uk

kiss and tell. ಕಿಸ್ ಅಂಡ್ ಟೆಲ್ ಎಂದರೆ ಯಾವುದಾದರೂ ಹುಡುಗಿಯನ್ನು ಪಟಾಯಿಸಿ ತನ್ನ ಮಿತ್ರ ವೃಂದಕ್ಕೆ ಟಾಮ್ ಟಾಮ್ ಮಾಡೋದು. ಇದಕ್ಕೆ ಕಿಸ್ ಅಂಡ್ ಟೆಲ್ ಎನ್ನುತ್ತಾರೆ. ಇದು ಸರಿಯಾದ ವರ್ತನೆಯಲ್ಲ ಆದರೂ ಈ ವರ್ತನೆ ಹುಡುಗರಿಗೆ ಕಿಕ್ ಕೊಡುತ್ತದೆ, ಅವನ ಪ್ರತಿಷ್ಠೆ ಮಿತ್ರ ರ ಸರ್ಕಲ್ ನಲ್ಲಿ ಹೆಚ್ಚುತ್ತದೆ. ಕಿಕ್ ಮತ್ತು ಪ್ರತಿಷ್ಠೆ ಬಂದಾಗ ಹೆಣ್ಣಿನ ಭಾವನೆಗೆ, ಮಾನಕ್ಕೆ ಕಿಮ್ಮತ್ತಿಲ್ಲ. ಇರಲಿ, ಇಷ್ಟು ಸಾಕು ಕಿಸ್ ಅಂಡ್ ಟೆಲ್ ನ ಪುರಾಣ. ಈಗ ‘ಕಿಲ್ ಅಂಡ್ ಟೆಲ್’ ಗೆ ಬರೋಣ. ಏನಪ್ಪಾ ಇದು ಕಿಲ್ ಅಂಡ್ ಟೆಲ್? ಹೊಸ ವಿದ್ಯಮಾನ?

ಕಳೆದ ಮೇ ತಿಂಗಳಲ್ಲಿ ಅಮೇರಿಕಾ ಬಿನ್ ಲಾಡೆನ್ ನ ಬೇಟೆ ಆಡಿತು. ಅಮೆರಿಕೆಯ ನಾವಿಕ ಸೇನೆಯ ಸೀಲ್ ಕಮಾಂಡೋಗಳು ಅಚ್ಚರಿದಾಯಕ ಕಾರ್ಯಾಚರಣೆ ನಡೆಸಿ ಪಾಕಿಸ್ತಾನದ ಸೇನೆಯ ಕೇಂದ್ರದ ಬಳಿಯೇ ಅವಿತಿದ್ದ ಲಾಡೆನ್ ನನ್ನು ಮುಗಿಸಿ ಅಮೆರಿಕನ್ನರು ನಿರಾಳ ಭಾವ ಅನುಭವಿಸುವಂತೆ ಮಾಡಿದರು. ಬಿನ್ ಲಾಡೆನ್ ಅಡಗುತಾಣದ ಬಗ್ಗೆ ವಿವರ ಕೊಟ್ಟಿದ್ದು ಪಾಕಿಸ್ತಾನದ ವೈದ್ಯನೊಬ್ಬ. ಈಗ ಸೀಲ್ ಕಮಾಂಡೋಗೆ ಸೇರಿದ ಒಬ್ಬ ಈ ಕಾರ್ಯಾಚರಣೆಯ ಬಗ್ಗೆ ಪುಸ್ತಕ ಬರೆದ. ಅಮೆರಿಕೆಗೆ ಈ ಕ್ರಮದಿಂದ ಅಸಮಾಧಾನ. ಅತ್ಯಂತ ರಹಸ್ಯ ಕಾರ್ಚಾರಣೆ ಯನ್ನ ಈ ರೀತಿ ಬಹಿರಂಗ ಗೊಳಿಸಿದರೆ ಆಗುವ ಪರಿಣಾಮದ ಬಗ್ಗೆ ಆತಂಕ. ಈ ಪುಸ್ತಕ ಬರೆದ ಸೀಲ್ ಕಮಾಂಡೋ ಮಾಡಿದ್ದು kill and tell “ಕಿಲ್ ಅಂಡ್ ಟೆಲ್” ಆಲ್ವಾ?

ವರ್ಡ್ ಪ್ರೆಸ್ ಬ್ಲಾಗ್ ತಾಣದಲ್ಲಿ ಪುಕ್ಕಟೆಯಾಗಿ ಬ್ಲಾಗಿಸುವ ಸೌಲಭ್ಯ ಇರೋದು ಎಲ್ರಿಗೂ ತಿಳಿದದ್ದೇ. ಈ ಸೌಲಭ್ಯ ಕೊಡುವ ವರ್ಡ್ ಪ್ರೆಸ್ ನವರದು ಅದೆಂಥದ್ದೇ ulterior motive ಇರಲಿ, ನನ್ನಂಥ ಬರಹದಲ್ಲಿ ಆಸಕ್ತಿ ಇರುವವರಿಗಂತೂ ಇದೊಂದು ಸೊಗಸಾದ ವ್ಯವಸ್ಥೆ. ಪ್ರತೀ ದಿನ ಪೋಸ್ಟ್ ಬರೆಯಲು ವರ್ಡ್ ಪ್ರೆಸ್ ಪ್ರೋತ್ಸಾಹಿಸುತ್ತದೆ. ಏಕೆಂದರೆ practice maketh perfect man, ಆಲ್ವಾ. ಹೆಚ್ಚು ಹೆಚ್ಚು ಮಾಡಿದಷ್ಟೂ ನಾವು ಮಾಡುವ ಕೆಲಸದಲ್ಲಿ ನೈಪುಣ್ಯತೆ ಗಳಿಸಿ ಕೊಳ್ಳುತ್ತೇವೆ. ಹೆಚ್ಚು ಓದಿದಷ್ಟೂ ಇನ್ನಷ್ಟು ಹೆಚ್ಚು ಓದಲು, ಓದಿದ್ದು ಗ್ರಹಿಸಲು ಸಹಾಯಕ. ಹಾಗೆಯೇ ಬರಹವೂ ಸಹ. ಹೆಚ್ಚು ಬರೆದಷ್ಟೂ writer’s blcok ಅನ್ನೋ ಪೀಡೆ ಹತ್ತಿರ ಸುಳಿಯೋಲ್ಲ. ನಾವು ಬ್ಲಾಗ್ ಪ್ರಕಟಿಸಿದ ಕೂಡಲೇ ಇದು ನಿಮ್ಮ ಇಷ್ಟನೆ ಬ್ಲಾಗ್ ಎಂದು ಎಣಿಕೆಯನ್ನು ತೋರಿಸುತ್ತದೆ ವರ್ಡ್ ಪ್ರೆಸ್ ಡ್ಯಾಶ್ ಬೋರ್ಡ್. ಅಂದರೆ ಈ ಪೋಸ್ಟ್ ನ ಹಿಂದಿನ ಪೋಸ್ಟು ನನ್ನ ೩೪೩ ನೆ ಯದು. ಈಗ ನನ್ನ ಗುರಿ ೩೪೫ ನೆ ಪೋಸ್ಟ್ ಎಂದು ಡ್ಯಾಶ್ ಬೋರ್ಡ್ ತೋರಿಸ್ತಾ ಇದೆ. ಚಿಕ್ಕದಾದ, ಕೈಗೆಟುಕುವ ಟಾರ್ಗೆಟ್. ಮುಂದಿನ ಗುರಿ ೪೦೦ ಎಂದಾಗಲೀ, ೩೫೦ ಎಂದಾಗಲೀ ಅಲ್ಲ. ೩೪೩ ಆದಾಗ ೩೪೫ ರ ಟಾರ್ಗೆಟ್. ೩೪೬ ಆದರೆ ೩೫೦ ರ ಟಾರ್ಗೆಟ್. ಚಿನ್ನ ಚಿನ್ನ ಆಸೈ ಥರ ಚಿಕ್ಕ ಚಿಕ್ಕ ಟಾರ್ಗೆಟ್. ಒಳ್ಳೆ ಐಡಿಯಾ ಅಲ್ಲವೇ? ಈ ಐಡಿಯಾ ನಮ್ಮ ಬದುಕಿನಲ್ಲೂ, ನಮ್ಮ ಮಕ್ಕಳ ಬದುಕಿನಲ್ಲೂ ಅಳವಡಿಸಿದರೆ ಹೇಗೆ?

ಈ ಪುಟ್ಟ ಟಾರ್ಗೆಟ್ ಕ್ರಿಕೆಟಿಗರಿಗೂ ಕೊಟ್ಟರೆ ಹೇಗೆ? ಮೊನ್ನೆ ಏಷ್ಯಾ ಕಪ್ ಫೈನಲ್ ನಲ್ಲಿ ಪಾಕ್ ನ ಮೊತ್ತವನ್ನು ಉತ್ತಮ ಪಡಿಸಿ ಕಪ್ ಗೆಲ್ಲಲು ಬಾಂಗ್ಲಾ ದೇಶ ಪಟ್ಟ ಸಾಹಸ ಮತ್ತು ವೈಫಲಿ ನೋಡಿದಾಗ ಈ ವರ್ಡ್ ಪ್ರೆಸ್ ಐಡಿಯಾ ಅಳವಡಿಸಿ ಬ್ಯಾಟ್ಸ್ ಮನ್ ಗಳಿಗೆ ದೊಡ್ಡ ಮೊತ್ತದ ಗುರಿ ಕೊಡದೆ ಚಿಕ್ಕ ಗುರಿ ಕೊಟ್ಟು ಕಳಿಸಿದ್ದರೆ ಕಪ್ ಗೆಲ್ಲುತ್ತಿದ್ದರೋ ಏನೋ.

ಏಪ್ರಿಲ್ ಫೂಲ್ – ಮೂರ್ಖರ ದಿನ. ಮೋಜಿಗೆಂದೇ ಹೇಳಿದ ಹಸೀ ಸುಳ್ಳನ್ನು ನಂಬಿ ಮೋಸ ಹೋದರೆ ಮೋಸ ಹೋದವನು ಹೇಗೆ ಮೂರ್ಖನಾಗುತ್ತಾನೋ, ದೇವರೇ ಬಲ್ಲ. ನಾನು ಯಾರಿಗೂ ಫೂಲ್ ಮಾಡೋಲ್ಲ, ನನ್ನ ಮೇಲೆ ಅದನ್ನು ಪ್ರಯೋಗಿಸುವುದೂ ನನಗಿಷ್ಟವಲ್ಲ.

ಇಂದು ಬೆಳಿಗ್ಗೆ ನನ್ನ ತಮ್ಮನಿಗೆ ನನ್ನ ತಂಗಿ ಫೋನ್ ಮಾಡಿ ಅಣ್ಣ ಅತ್ತಿಗೆ ನಡುವೆ ದೊಡ್ಡ ಜಗಳ ನಡೀತಿದೆ, ನಾನು ಹೋಗಿ ಸಮಾಧಾನ ಮಾಡಿದರೂ ಕೇಳ್ತಾ ಇಲ್ಲ ಎಂದು ಫೋನ್ ಮಾಡಿದಳು. ತನ್ನ ಪಾಡಿಗೆ ತಾನು ಹೊಂಡಾ ಬೈಕ್ ಶೋ ರೂಮಿನಲ್ಲಿ ಸ್ಟಾಕ್ ತೆಗೆದು ಕೊಳ್ಳುತ್ತಿದ್ದ ನನ್ನ ತಮ್ಮ ಗಾಭರಿಯಾಗಿ ನನಗೆ ಕಾಲ್ ಮಾಡಿದ. ಪರಸ್ಪರ ಸೌಖ್ಯ ವಿಚಾರಿಸಿ ಕೊಂಡ ನಂತರ ಕೇಳಿದ “ಏನಣ್ಣಾ, ಪ್ರಾಬ್ಲಮ್ಮು?” ಪ್ರಾಬ್ಲಾಮ್ಮಾ, ಏನೂ ಇಲ್ವಲ್ಲಾ ಎಂದಾಗ ಅವನು ಅಲ್ಲಾ, ನೀನು ಅತ್ತಿಗೆ ಜಗಳ ಮಾಡಿ ಕೊಂಡಿದ್ದೀರಂತೆ ಎಂದು ಆತಂಕದಿಂದ ಕೇಳಿದ. ನನಗೆ ತಿಳಿಯಿತು ಓಹೋ ಇದು ಎಪ್ರಿಲ್ ಮೊದಲ ದಿನದ ಹುಚ್ಚು ಎಂದು. ಏನಿಲ್ಲ ಕಣೋ ಇವತ್ತು ಏಪ್ರಿಲ್ ಒಂದಲ್ವಾ ಎಂದು ಹೇಳುತ್ತಿದ್ದಂತೆ ಅವನಿಗೆ ಅರ್ಥವಾಗಿ ನಕ್ಕು ಫೋನ್ ಇಟ್ಟ.

ಈ ತಮಾಷೆಯಲ್ಲಿ ಸಿಕ್ಕಿದ್ದಾದರೂ ಏನು? ಒಂದು ದೊಡ್ಡ ಮೂರ್ಖ ನಗುವೋ?