ಅಂತರ್ಜಾಲದ ಮೇಲೆ ಕಡಿವಾಣ ಹಾಕಲು ಸರಕಾರಗಳು ಯೋಚಿಸುವುದರ ವಿರುದ್ಧ ಅಂತರ್ಜಾಲದ ಮಾಹಿತಿ ಸಾಗರವಾದ ‘ವಿಕಿ ಪೀಡಿಯ’ ಸಮರವನ್ನು ಸಾರಿದ್ದು ತನ್ನ ಗೂಡಂಗಡಿಯನ್ನು ಒಂದು ದಿನದ ಕಾಲ ಬಂದ್ ಮಾಡಿ ಪ್ರತಿಭಟನೆ ವ್ಯಕ್ತಪಡಿಸಿದೆ. ಬಂದ್ ಮಾಡಿ ಪ್ರತಿಭಟನೆ ಮಾಡೋ ಕಲೆ ವಿಕಿ ಯಲ್ಲಿ ಕೆಲಸ ಮಾಡೋ ಯಾರಾದರೂ ಮಲಯಾಳೀ ಕಲಿಸಿರಬಹುದು. ಏಕೆಂದರೆ ಕೇರಳ “ಗಾಡ್ಸ್ ಓನ್ ಕಂಟ್ರಿ” ಮಾತ್ರ ಅಲ್ಲ, bandh’s own state ಸಹ ಹೌದು. ಇರಲಿ ಈಗ ಸರಕಾರಗಳ ಹಸ್ತ ಕ್ಷೇಪ ಅಥವಾ ಮೂಗು ತೂರಿಸುವಿಕೆಯ ಬಗ್ಗೆ ಮಾತನಾಡೋಣ.
ನಮ್ಮ ಕೇಂದ್ರದ ಘನ ಸರಕಾರದ ಉಸ್ತುವಾರಿ ವಹಿಸಿ ಕೊಂಡಿರುವ ಪಕ್ಷದ ನಾಯಕಿಯ ಮೇಲೆ ಬೇಡದ ಸುದ್ದಿ ಮಾಹಿತಿಗಳು ಅಂತರ್ಜಾಲದಲ್ಲಿ ಹೇರಳವಾಗಿ ಇರುವುದರ ಬಗ್ಗೆ ಮಾನವ ಸಂಪನ್ಮೂಲ ಸಚಿವ ಕಪಿಲ್ ಸಿಬ್ಬಲ್ ಸಿಟ್ಟಾಗಿದ್ದರು. ಸರಕಾರಕ್ಕೆ ಸಿಟ್ಟು ಬಂದರೆ ಸಿಟ್ಟನ್ನು ಶಮನ ಮಾಡಲು ಸುಲಭ ಉಪಾಯ ಹುಡುಕುತ್ತಾರೆ. ಅಂತರ್ಜಾಲವನ್ನೇ ನಿಯಂತ್ರಿಸಿ ಬಿಡೋದು. ಅರಬ್ ದೇಶಗಳಲ್ಲಿ ಕೆಲ ತಿಂಗಳುಗಳಿಂದ ನಡೆಯುತ್ತಿರುವ ಕ್ರಾಂತಿಗೂ ಅಂತರ್ಜಾಲ ಕಾರಣ ಎಂದು ಎಲ್ಲರಿಗೂ ಗೊತ್ತು, ಆಳುವವರಿಗೂ, ಆಳಿಸಿ ಕೊಳ್ಳುವವರಿಗೂ, ಆದರೂ ಇಲ್ಲಿ ಯಾರೂ ಅಂತರ್ಜಾಲವನ್ನು ನಿರೋಧಿಸುವ ಸಾಹಸ ಮಾಡಲಿಲ್ಲ, ಸಾಕಷ್ಟು despotic ಅಧಿಕಾರಗಳಿದ್ದೂ ಸಹ. ನಮ್ಮದು ಪ್ರಜಾತಂತ್ರ, (ಹೆಸರಿಗೆ ಮಾತ್ರ ಪ್ರಜಾ ತಂತ್ರ, ಏಕೆಂದರೆ ಪ್ರಜೆಗೆ ತಂತ್ರ ಏನೂ ಗೊತ್ತಿಲ್ಲ, ಗೊತ್ತಿರೋದೆಲ್ಲಾ ಪ್ರಭುಗಳಿಗೆ) ಆದರೂ ರಂಗೋಲಿ ನುಸುಳಿ ನಿರ್ಬಂಧ ಹೇರಲೇ ಬೇಕು ಎಂದರೆ ಐಡಿಯಾ ಹೊಳೆಯದೆ ಇರುತ್ತದೆಯೇ? ಏನೂ ಸಿಗದಿದ್ದರೂ ಭಯೋತ್ಪಾದನೆ ಎನ್ನೋ ಬೆದರುಬೊಂಬೆ ಸಾಕು, ಜನ ತಮ್ಮ ಎಲ್ಲಾ ಸ್ವಾತಂತ್ರ್ಯಗಳನ್ನೂ ಸರಕಾರದ ಕೈಗಳಿಗೆ ಒತ್ತೆ ಇಡಲು.
ತಮ್ಮ ಸಮಯಸಾಧಕತನ, ಮೋಸ, ದಗಲಬಾಜಿ ಇವುಗಳು ಸಾಂಗವಾಗಿ ನಡೆದು ಕೊಂಡು ಹೋಗಲು ಅಂತರ್ಜಾಲದ ಬಾಲ ಕತ್ತರಿಸಲು ಸರಕಾರಗಳು ಹವಣಿಸಿದರೆ ನನ್ನಂಥ “ಆಮ್ ಆದ್ಮಿ” (ಮಾವಿನ ಮನುಷ್ಯ ಅಲ್ಲ ರೀ, ಸಾಮಾನ್ಯ ಮನುಷ್ಯ) ಏನೂ ಮಾಡಲಾರ, ಕೆಳಗೆ ಕಾಣಿಸಿದ ಒಂದು “ಕೊಂಡಿ” ಯ ಭಿನ್ನಹ ಸರಕಾರಗಳಿಗೆ ಕೊಡಮಾಡುವುದರ ಹೊರತು,
ಹಳೇ ಸೇತುವೆ 