ಒಬಾಮಾ ಒಸಾಮಾನನ್ನು ಬಲಿ ಹಾಕಿದ ಕೀರ್ತಿಗೆ ಪಾತ್ರರಾದರು. ಪಾಪ ಯುದ್ಧ ಕೋರ ಜಾರ್ಜ್ ಬುಶ್ ಒಸಾಮಾ ನನ್ನು ಹಿಡ್ಯಲು ಹಾಕಿದ ತಳಪಾಯ, ವ್ಯಯಿಸಿದ ಸಮಯ, ಎಲ್ಲಾ ಕೊನೆಗೆ ಕೆಲಸಕ್ಕೆ ಬಂದು ಒಸಾಮಾನ ಅವಸಾನದಲ್ಲಿ ಮುಕ್ತಾಯವಾಯಿತು, ಒಬಾಮಾಗೆ ಕಿರೀಟ ಪ್ರದಾನ ಮಾಡಲಾಯಿತು. ಕಷ್ಟಪಟ್ಟಿದ್ದು ಬುಶ್, ಹೆಸರು ಒಬಾಮಾಗೆ. “ನನ್ನ ನಿರ್ದೇಶನ” ದ ಮೇರೆಗೆ ನಾವಿಕ “ಸೀಲ್ 6” ವಿಶೇಷ ಪಡೆ ಒಸಾಮಾನನ್ನು ಬಲಿ ಹಾಕಿತು ಎಂದು ಕೊಚ್ಚಿ ಕೊಂಡರು ಅಧ್ಯಕ್ಷ ಮಹೋದಯರು. ಕೆಲವರಿಗೆ ಮುನಿಸು. ಜಾರ್ಜ್ ಬುಶ್ ನನ್ನು ವಂದಿಸೋ ಬದಲು narcissistic ಆಗಿ ಗೋಚರಿಸಿದರು ಒಬಾಮಾ ಎಂದು. ಅದೇನೇ ಇರಲಿ, ಯಾವ ಶುಭ ಕಾರ್ಯಕ್ಕೂ ಏನಾದರೂ ಅಡೆ ತಡೆ, ಟೀಕೆಗಳು ಇದ್ದಿದ್ದೆ. ಇಂದಿನ ಅಮೆರಿಕೆಯ NPR ರೇಡಿಯೋ ಕಾರ್ಯಕ್ರಮದಲ್ಲಿ ಬಿತ್ತರಗೊಂಡ ಒಂದು ಹಾಸ್ಯ ಪ್ರಸಂಗ ಸ್ವಲ್ಪ ಕೇಳಿ.

ಒಸಾಮಾನನ್ನು ಕೊಂದ ನಂತರ ಅಧ್ಯಕ್ಷ ಒಬಾಮಾ ತಮ್ಮ ಪತ್ನಿ ಮಿಷೆಲ್ (ಒಬಾಮಾ ಪತ್ನಿ) ಜೊತೆ ಲೈಂಗಿಕ ಚಕ್ಕಂದ ಆಡಿರಬಹುದೇ ಎಂದು? ಏಕೆಂದರೆ ತನ್ನ ಗಂಡು ಪ್ರಪಂಚವನ್ನೇ ಬೆಚ್ಚಿ ಬೀಳಿಸುತ್ತಿದ್ದ ದುರುಳನೊಬ್ಬನನ್ನು ಹೊಡೆದು ಉರುಳಿಸಿದ ಎಂದರೆ ಹೆಣ್ಣಿಗೆ ಅಥವಾ ಹೆಂಡತಿಗೆ ಒಂದು ರೀತಿಯ “turn on” ಆಗುತ್ತಂತೆ. ಒಂದು ತೆರನಾದ ಉನ್ಮಾದ. ಹಾಗಾಗಿ ಸಹಜವಾಗಿಯೇ ಆಕೆ ತನ್ನಿನಿಯನನ್ನು ಚಂದ್ರಮಂಚಕ್ಕೆ ಎಳೆದು ತಂದು, ಬಾ, ವಿಶ್ವವನ್ನೇ ನಲುಗಿಸಿದವನನ್ನು ಬಲಿ ಹಾಕಿ ಪ್ರಪಂಚವನ್ನು peaceful place ಆಗಿ ಮಾಡಿದ್ದೀಯಾ, ಈಗ ನನ್ನ ಮಂಚವನ್ನು ಪ್ರಪಂಚದಲ್ಲೇ dangerous place ಆಗಿ ಪರಿವರ್ತಿಸು ಎಂದು ಹೇಳಿರಬಹುದಂತೆ. ಹೇಗಿದೆ ಊಹೆ? ಸುತ್ತಿ ಬಳಸಿ ಯಾವುದೇ ವಿಷಯದ ಬಗ್ಗೆ ಚರ್ಚೆ ನಡೆದರೂ ಅದಕ್ಕೆ ಕಾಮನ ಬಣ್ಣ ಲೇಪಿಸಲೇಬೇಕು, ಇದು ಜಗದ (ಹಿರಿಯಣ್ಣನ) ನಿಯಮ.